Il-MEPA tbaxxi rasha għal Gonzi

Katigoriji ohra

Il-MEPA tbaxxi rasha għal Gonzi

30 ta’ Jannar, 2010

Id-deċiżjoni tal-MEPA li tapprova l-permess biex issir l-estensjoni tal-power station f’Delimara, minkejja li l-Partit Laburista u membri parlamentari tan-naħa tal-PN appellaw biex id-deċiżjoni titħalla għal wara li l-Awditur Ġenerali jinvestiga u l-Parlament jiddiskuti l-każ, turi l-arroganza li tikkaratterizza lil dan il-Gvern u l-awtoritaijiet tiegħu.

Dan kien sostnut mill-Partit Laburista waqt li qal li l-bieraħ filgħodu reġa’ talab il-posponiment tal-vot b’mod formali permezz tad-Deputat Parlamentari Roderick Galdes, li hu membru tal-Bord, u li ressaq mozzjoni. Iżda ħadd mill-membri l-oħra tal-bord tal-MEPA, kollha persuni ta’ fiduċja ta’ Lawrence Gonzi, ma ssekonda din il-mozzjoni biex jittieħed vot demokratiku b’rispett ta’ dawk kollha li se jkunu affetwati minn dan l-iżvilupp.

Ta’ min jinnota, qal il-PL, li l-permess li ħareġ ilbieraħ hu outline development permit, li skont is-suppost riforma tal-MEPA, se jispiċċa għax il-Gvern identifika fiha sors ta’ abbuż fil-proċess tal-għoti tal-permessi.

Din kienet xhieda ċara kristall li l-Gvern qed jindaħal fil-proċess tal-MEPA u ta struzzjonijiet ċari biex il-bord tal-MEPA jibqa’ għaddej bid-deċiżjoni lesta tiegħu akkost ta’ kollox. Altru milli Lawrence Gonzi jagħmel appelli għall-indipendenza tal-MEPA u biex il-membri iħossuhom liberi. Hemm każi ċari u dokumentati ta’ dan l-indħil.

“Lawrence Gonzi u l-MEPA injoraw is-sentiment tal-maġġoranza tal-Parlament u wera li ma jimpurtahx mill-effetti ambjentali u ekonomiċi li se jsofru l-familji u n-negozji”, temm jgħid il-Partit Laburista.