Minkejja li l-korsijiet ilhom li ntemmu, uħud minn April 2010, dawn l-edukaturi baq­għu ma ġewx assimilati. Il-Gvern ukoll baqa’ ma rreklutax għadd ta’ Kindergarten Assistants li għaddew mill-interview ta’ Kindergarten Assistant 2 u ħallihom jaħdmu l-istess xogħol b’kundizzjonijiet inqas. Il-MUT saħqet li huwa tassew ta’ għajb li minkejja ftehim li sar bejn il-Union u l-Gvern fl-2009, dan il-ftehim baqa’ mhux onorat.

Dan qiegħed isir b’detriment għan-nies milqutin u b’nuqqas ta’ rispett lejn dawn l-impjegati li qegħdin jagħtu dak kollu possibbli biex l-edukazzjoni bikrija tkun ta’ suċċess.

Dan it-trattament hu eżempju ta’ kif id-djalogu soċjali jonqsu ħafna fejn jitjieb. Fid-dawl ta’ dan kollu, il-gradi kollha tal-għalliema qegħ­din ikunu mħeġġin juru s-solidarjetà ma’ sħabhom u ma jagħmlu l-ebda xogħol li b’xi mod jista’ jiġi interpretat bħala strike breaking. Il-Union qiegħda wkoll titlob lill-ġenituri biex jikkoperaw mal-għalliema ta’ wliedhom f’din il-kwistjoni.