Iben il-koppja fil-fatt spiċċa biex tkeċċa darbtejn mid-dar u llum jgħix waħdu, anzi l-omm, meta telqet mid-dar għax ma felħitx aktar, kellha ssib refuġju miegħu. Anke l- atteġġjament tiegħu lejn bintu u żewġha minn dejjem kien wieħed ta’ ġlied u sfida għall-ebda raġuni.

Fid-dawl ta’ dan, il-Qorti qalet li r-ra­ġel m’għandux ikun sospriż li llum uliedu huma kontra tiegħu. Kompliet tgħid li l-atteġġjament u l-mod kif jaħsibha jidher ċar bil-mod kif kisser kollox fid-dar wara li l-Qorti kienet ordnatlu jiżgombra minnha, għax dehrilha li ma kienx ġust li huwa jgħix fid-dar waħdu u martu, għax imkeċċija, tibqa’ tgħix fl-iskomdu.

Ta’ min jgħid li wara li ġie deċiż mill-Qorti Ċivili (Sezzjoni tal-Familja), il-każ imbagħad kien ġie eżaminat ukoll mill-ġdid mill-Qorti tal-Appell wara li r-raġel oġġezzjona li jingħata t-tort lilu talli ż-żwieġ sfaxxa. Imma anke din il-Qorti ddikja­rat li hi konvinta li r-raġel kien isawwat lil martu kif ukoll lil uliedu u kien għamlilhom ħajjit­hom passjoni.



Qishom l-iskjavi tieghu

“Ilkoll qablu li kien aggressiv u kien juża mhux biss vjolenza fiżika fuqhom, imma anke vjolenza morali biex jid­deg­radahom u jittrattahom qis­hom l-iskjavi tiegħu. Il-bini tad-dar, il-klieb, il-karozzi u d-de­lizzji l-oħrajn tiegħu kienu aktar importanti mill-familja, u żmien għall-familja ma kellux. Ġew prodotti diversi rapporti li saru lill-Pulizija wara l-ġlied li kien jinqala’ u feriti li ġarrbet il-mara. Ir-raġel kien anke ġie kkundannat mill-Qorti Krimina­li u marbut biex ma jimmoles­tax lil martu u lill-familja.”

Żied jingħad li kien minħabba l-imġieba ħażina u insappor­tabbli tiegħu, li l-mara kienet kostretta, kontra r-rieda tagħha, li titlaq mid-dar matrimonjali u ssib refuġju għand uliedha li wkoll ġew imkeċċijin minn mis­sierhom.

L-omm marret diversi drabi lura d-dar biex tiġbor ħwejjiġha, anke akkumpanjata mill-Pulizija, iżda żewġha ma daħħalhiex. Saħansitra spiċċa biex biddel is-serratura tad-dar u tal-garaxx biex żgur l-omm u binha ma jkollhomx aċċess għad-dar fejn baqa’ jgħix waħdu, u għal xi żmien anke ma’ mara oħra li kel­lu relazzjoni magħha, sakemm ġie ordnat jiżgombra mill-Qorti.

Il-Qorti tal-Appell spjegat li dawn iċ-ċirkostanzi juru li l-mara m’abbandunatx id-dar matrimonjali liberament, kif allega żewġha, iżda mġiegħla minnu tagħmel hekk minħabba l-aġir aggressiv tiegħu u min­ħabba s-sigurtà tagħha u ta’ wliedha.

Ħareġ ukoll li sa mill-bidu tal-ħajja miżżewġa r-raġel qatt ma ta xejn mill-paga lil martu. Dan irriżulta minn dak li qalet binthom meta spjegat kif omm­ha kellha taħdem bilfors min­ħabba d-dejn li kienu tgħabbew bih, u peress li missierha ossess­jana ruħu biex jibni post u li kien anke jikkonsidrah tiegħu.

“Ommi ħarġet taħdem għax missieri ried bilfors jibni post u għalhekk kellhom jissellfu mill-bank u mill-paga tiegħu kien iħallas il-‘loan’ u mill-pagi ta’ ommi konna ngħixu.

Bilfors kellha toħroġ taħdem għax missieri kien jirrifjuta li jgħaddilha flus għall-ħajja u biex trabbina. Minn meta beda jibni l-post beda jossessjona ruħu bih u dej­jem jgħid li l-post huwa tiegħu biss.”