It-tibdil fis-sistema tal-bejgħ ta’ prodotti agrikoli:
Il-Gvern stenna wisq biex beda jiċċaqlaq |
Il-Partit Laburista jaqbel mal-miżuri mħabbrin mill-Gvern għall-ħolqien ta’ sistema fejn il-bdiewa jkunu jistgħu jbigħu l-prodotti tagħhom direttament lill-konsumaturi, anzi jemmen li l-Gvern ta’ Lawrence Gonzi stenna wisq biex beda jiċċaqlaq.
“Kienu l-bdiewa u l-konsumaturi li ħallsu l-prezz ta’ dan id-dewmien permezz ta’ dħul inqas u prezzijiet ogħla rispettivament,” qal l-Avukat Joseph Sammut, Kelliem Ewlieni Laburista għall-Biedja u s-Sajd. Hu qal li fl-istess waqt li jappoġġja dawn il-miżuri, il-PL jemmen li dan m’għandux ifisser li ma jsirux ir-riformi tant meħtieġa fil-Pitkalija, li tħalliet abbandunata għal tant snin taħt dan il-Gvern.
|
|
Ippjanar serju kien ikun ifisser li, bħala eżempju, jitwaqqaf bord tal-maniġment bis-sehem ta’ dawk interessati u li permezz tiegħu titwaqqaf struttura moderna ta’ Pitkalija li tiggarantixxi l-ogħla standards tas-swieq fejn il-konsumatur ikollu għażla ta’ kwalità billi l-prodotti jkunu ‘graded’ kif jagħmlu swieqi oħrajn fil-pajjiżi tal-UE.
Proġett simili kien jikkwalifika anke għal fondi Ewropej. Fl-istess waqt, il-Gvern irid jiċċara jekk il-bdiewa li se jbigħu direttament lill-konsumaturi humiex se jkunu eliġibbli għas-sussidju bħal fil-każ tal-prodotti li jidħlu fil-Pitkalija, u b’liema mod se jsir il-ħlas.
Wieħed jittama li l-Gvern ma jkomplix jinjora lill-bdiewa u jibqa’ jarahom dubbien b’arroganza li saret tipika ta’ dan il-Gvern, qal l-Avukat Sammut.
|
|
