Il-UĦM tesprimi t-tħassib tagħha dwar iż-żieda  fil-prezz tal-fuels li tħabbret u li daħlet fis-seħħ b’effett mill-1 ta’ Marzu 2011.  Iż-żieda f’dawn il-prezzijiet tal-fuels ser tkompli tpoġġi pressjoni fuq il-livell ta’ għajxien u l-kwalita` tal-ħajja tal-ħaddiema, pensjonanti u l-familji tagħhom.  Iż-żieda li tħabbret fil-bidu ta’ din is-sena fiċ-ċilindri tal-gass flimkien maż-żieda fil-prezzijiet tal-fuels qed iħallu effett negattiv kemm fuq il-familji kif ukoll fuq in-negozji.  

Il-UĦM konformi mad-deċiżjoni li ttieħdet bejn l-imsieħba soċjali kollha fl-ewwel laqgħa għal din is-sena tal-Kunsill Malti għall-Iżvilupp Ekonomiku u Soċjali qed tistenna r-riżultati ta’ l-analiżi ekonomika u soċjali li fil-preżent qed titħejja mill-Ministeru tal-Finanzi dwar l-impatt li tali żidiet qed iħallu fuq il-poplu kollu, iżda b’mod partikolari fuq dawk il-faxexx fis-soċjeta` l-aktar vulnerabbli.