Il-mozzjoni, imressqa lbieraħ fil-għodu mill-Whip Parlamentari tal-Partit Laburista Joe Mizzi, “titħasseb bis-sitwazzjoni ekonomika u soċjali diffiċli li bħa­lissa qegħdin iħossu l-familji u n-negozji f’pajjiżna, liema sitwazzjoni hi prinċipalment l-effett ta’ deċiż­jo­nijiet meħudin minn dan il-Gvern fi żmien meta l-qagħda ekonomika internazzjonali tirrekjedi politika li tistimula b’mod għaqli l-ekonomija u ma tkomplix tgħabbiha bi spejjeż żejda, speċjalment dawk li ġej­jin mill-ineffiċjenzi tal-monopol­ji statali konċernati.”

“Tinnota li dawn id-diffikultajiet ekonomiċi se jkunu qegħdin jiżdiedu bil-piżijiet taż-żidiet fit-tariffi mħabbra f’dawn l-Avviżi Legali.”

“Tagħraf li dawn iż-żidiet qegħdin ipoġġu fil-periklu pos­tijiet tax-xogħol fi żmien meta l-ekonomija tagħna teħtieġ li tir­kupra malajr mis-sitwazzjoni preżenti.”

“Tfakkar li parti miż-żidiet kontemplati fl-Avviżi Legali huma maħsubin biex jagħmlu tajjeb għal ineffiċjenzi li jirri­żul­taw mill-mod ta’ kif qegħdin jiġu mmexxijin monopolji stata­li konċernati, minħabba kalkoli tekniċi ta’ Return on Capital Employed li tefgħu aktar piż fuq il-familji u negozji, kif ukoll minħabba assunzjonijiet żbaljati li saru mill-persuni responsabbli fix-xhur li għaddew.”

“Tinnota li kien hemm għadd ta’ diskrepanzi u nuqqas ta’ informazzjoni ċara u pubblika fil-figuri differenti mogħtija mill-Gvern u mill-awtoritajiet matul ix-xhur li għaddew, fosthom dwar il-mod kif inħadmu dawn it-tariffi, ix-xiri ta’ żejt u l-ope­rat tal-monopolji statali konċernati.”

“Tinnota li permezz ta’ dawn l-Avviżi Legali qed jiġi formalizzat id-dħul tal-kunċett ta’ tax­xa fuq id-Drenaġġ.”

“Titħasseb li dawn l-Avviżi Legali ġew ippubblikati filwaqt li l-Gvern qed jgħid li qed jikkonsulta mal-imsieħba soċjali, liema konsultazzjoni ma saritx qabel ma daħlu fis-seħħ iż-żi­diet fit-tariffi.”

“Tikkunsidra li anki meta wie­ħed jieħu f’konsiderazzjoni l-kumpens li l-Gvern qal li se jagħti lill-familji, dan xorta se jħalli lill-istess familji jiffaċċjaw prattikament l-istess livelli re­kord ta’ tariffi mħabbra f’ Ottubru, 2008, meta l-prezz taż-żejt kien saħansitra ogħla.”

“Titħasseb li t-tariffi mħabbrin għan-negozji u industrija huma l-ogħla fost il-pajjiżi tal-Unjoni Ewropea, u li dan il-fatt ixekkel lil dawn in-negozji milli jirkupraw mis-sitwazzjoni li jin­sabu fiha u joħolqu postijiet tax-xogħol ġodda, u saħansitra jipperikola postijiet tax-xogħol eżistenti.”

“Tqis li fil-kuntest ta’ dan kollu, dawn l-Avviżi Legali huma anti-soċjali, jimminaw l-ekonomija u x-xogħol, u għaliex se jgħabbu lill-familji u negozji b’piżijiet akbar li se jkollhom impatt qawwi fuq il-livell tal-għajxien u l-kompetittività ta’ pajjiżna.”