Min-naħa tagħha, is-Senior Principal Joan Spiteri, aktar tard dakinhar, marret iddepożitat il-flus kollha li kienu nġabru mil-liċenzji, fil-Bank of Valletta. Ġara iżda li l-għada filgħodu, il-Maniġer tal-Bank Jospeh Aquilina, ikkomunika ma’ Joan Spiteri u informaha li mal-flus li kienet għaddietlu kien hemm karta ta’ €100 li kienet falza. Spiteri sostniet li l-uniċi żewġ karti ta’ €100 li kienet daħħlet il-jum ta’ qabel kienet irċeviethom mingħand l-akkużat.
Wara dak li qalilha l-Maniġer tal-Bank, Spiteri kkomunikat mal-imputat biex tinformah dwar dak li ġara u allegatament weġibha li dik il-karta tal-flus kien ġabha mill-bank tan-Nadur meta kien bidel xi flus Maltin. Min-naħa tagħha, Spiteri għamlet rapport l-Għassa tal-Pulizija.
Min-naħa tiegħu Azzopardi kien xehed fil-Qorti fejn qal li kien mar ħallas il-liċenzji għal sentejn u li fuqu kellu karta waħda biss ta’ €100. Qal li għall-ewwel ma ftakarx minn fejn kien ġab din il-karta ta’ €100, iżda wara rrikonoxxa li fil-fatt kienu rċevewha l-ħaddiema tiegħu minn xi supermarket tiegħu.
Kompla jgħid li l-karti tal-flus li kienu jirċievu fis-supermarket kienu jiġu verifikati humiex foloz jew le permezz ta’ magna apposta. Qal li anke l-iskrivana tad-Dipartiment tal-Liċenzji kienet iċċekkjat il-flus bil-magna. Fix-xhieda tiegħu, kompla jgħid meta l-għada ċemplitlu l-iskrivana tal-liċenzji, qalilha li kien iċċekkja u kienet tajba. Żied jgħid li hi stess kienet iċċekkjatha u wkoll sabitha tajba.
Min-naħa tagħha, il-Qorti tal-Appell ippreseduta mill-Prim Imħallef Silvio Camilleri qalet li mill-provi li nstemgħu quddiemha "ma jirriżulta bl-ebda mod li fil-mument li l-akkużat rċieva l-karta tal-flus inkwistjoni jew tul il-kors kollu taż-żmien li kien fil-kustodja jew pussess tagħha, huwa kien f’xi moment konxju li kienet falza". Għaldaqstant Azzopardi kien illiberat minn kull akkuża.
